ឥណ្ឌូណេស៊ី៖​ ក្រុមជម្រើសជាតិកម្ពុជា នឹងត្រូវបន្តជួបជាមួយក្រុមម្ចាស់ផ្ទះឥណ្ឌូណេស៊ី ក្នុងការប្រកួតទីពីរនៃពានរង្វាន់ប្រចាំតំបន់ AFF Mitsubishi Electric Cup ២០២២ នាវេលាម៉ោង ៤៖៣០នាទីរសៀល នាកីឡដ្ឋានជាតិឥណ្ឌូណេស៊ី Gelora Bung Karno។

នេះគឺជាការប្រកួតទីពីររបស់ក្រុមជម្រើសជាតិកម្ពុជា បន្ទាប់ពីជ័យជម្នះបើកឆាកជួបជាមួយក្រុមជម្រើសជាតិហ្វីលីពីន និងបានយកឈ្នះក្នុងលទ្ធផល ៣-២ នៅក្នុងការប្រកួតកាលពីថ្ងៃទី២១ ខែធ្នូកន្លងទៅ នៅពហុកីឡដ្ឋានជាតិមរតកតេជោ។ សមាសភាពទាំងអស់របស់កម្ពុជា​ ពុំទាន់មានបញ្ហាអវត្តមានកីឡាករណាមួយនៅឡើយទេ ខណៈការប្រកួតនៅទឹកដីឥណ្ឌូណេស៊ី ក្រោមក្រសែភ្នែកអ្នកគាំទ្រដ៏មោះមុតរាប់ម៉ឺននាក់អាចជាកត្តាលំបាកសម្រាប់កម្ពុជា។

ងាកទៅកាន់ក្រុមជម្រើសជាតិឥណ្ឌូណេស៊ីវិញ នេះគឺជាការប្រកួតបើកឆាករបស់ខ្លួននៃពានរង្វាន់ AFF Mitsubishi Electric Cup នឹងជាការប្រកួតក្នុងដីទៀតនោះ ឥណ្ឌូណេស៊ី ពិតជាស្រែកឃ្លានជ័យជម្នះសម្រាប់អ្នកគាំទ្ររបស់ខ្លួន។

ការប្រកួតរវាងក្រុមជម្រើសជាតិកម្ពុជា ទល់នឹងក្រុមជម្រើសជាតិណ្ឌូណេស៊ី នារសៀលនេះ អ្នកគាំទ្រទាំងអស់ក៏អាចតាមដានទស្សនាតាមរយៈការផ្សាយបន្តផ្ទាល់លើកញ្ចក់ទូរទស្សន៍ BTV និងតាមរយៈទំព័រហ្វេសប៊ុកផ្លូវការ សហព័ន្ធកីឡាបាល់ទាត់កម្ពុជា ផងដែរ៕